Schöpfungsgeschichte op Kölsch (Teil 9)

Was zuletzt geschah.
 
„Äwwer ich dunn, wat ich kann. Drei oder och vier Woche weed et duure. Die han jo Kaffee. Ich mache mich ens an die Arbeit.“ Met nem Leedche op de Leppe jingk Hä Richtung Werkstatt un jov met d´r Repp in Singer rächte Hand wie ne Dirijent d´r Takt an.
 
Hä setzte sich op dä Hocker an Singer Töpferschiev, nohm alles, wat Hä en der zwei Keste, wo „Minsche“ drop stund, noch finge kunnt und packte alles met der Repp zesamme op die Schiev. Hä schöddelte ein op et andere Mol singe Kopp. „Verdammich äwwer och. Wenn nur der Engel met singer blöde Aap nix us d´r Minsche-Kess stibitz hätt, künnt et ricke. Äwwer jetz weed et eng“.
 
Hä verrammelte die Pooz vun drenne un jov sich an et arbeide. Mir Engelcher, die jo en Singer Köch beim Kaffee soße, zuckten immer widder ens zesamme, wenn Hä für luuter Wot ne Brüll loße dät. Jot, dat Adam noch usjeschalt wor. Der stund ahnungslos wie fessjewaaße ob d´r Wies. Drenne wor Detlev fruh, dat hä sich met singer Kaffeekann jet avvlenke kunnt. Nur uns jingk hä jehörig op de Nerve. Kaum wor en Tass half leer, stund Detlev met d´r Kann hinger einem. Uns kom d´r Kaffee als bahl us de Uhre erus. „Mir jonn jetz no huss“, entschied ich als Oberengel. „Alle zwei Daach luure ich, ob Hä aus Singer Werkstatt erus es. Ich rofe üch dann“.
 
Un su verjingk widder Daach für Daach, Woch für Woch. Die Finstere vun Singer Werkstatt wore vun drenne beschlage. M´r kunnt nit spinkse. Äwwer et jenüchte och, ze hüüre, wie Hä unzefredde am Knöttere wor. Jet Jenaues kunnt ich leider nit verstonn.
 
Et wor Winter jewode un widder Fröhjohr, als morjens die Pooz vun Singer Werstatt sperrangelwick opstund. Hä hat mich längs entdeckt und winkte mich jot jelaunt nöher. „Ariel, luur ens. Es dat nit ei prächtich Mädche“? Ich böckte mich vür d´r Töpferschiev, ob der ne Minsch stund, der dem Adam ärsch ähnlich soch, äwwer trotzdem janz anders wor.
D´r Leeve Jott driehte die Schiev janz langsam, domet ich mir dat Minschepöppche vun alle Sigge beluure kunnt. „Scheff, die es Dir äwwer ärsch jot jelunge“! Ich wor restlos bejeistert.
 
„Dann well ich ens hoffe, dat der Adam dat och esu süht“, sproch Hä. „Ich jonn dä ens holle“.
 
Hä kom met Adam zuröck, der no dä lange Zick em Offline-Modus noch nit janz bei sich wor. „Adam, kumm ens luure. Dat he es ding Jefährtin, öm die du mich jebedde häs“. „Boah, wat sieht die äwwer jei… ähm… klasse us“!
 
„Affwade, Adam. Noch es kei Lewwe dren. Jangk ens ei paar Schrett zuröck. M´r weiß jo nie…“ Hä nohm dä kleine Minsch vorsichtich en die Hand und dät ihm janz hösch Jöttliche Odem enblose.
 
„Loss mich eraff! Du deist m´r wieh! Un nemm Ding Fingere do vüüre fott! Wie süht dat he üwwerhaup us? Kein Jardinge vür de Finstere! Dä Boddem zick hundert Johr nit mieh jefäch! Un wer es dä Kähl, der do hinge steht un mich su blöd anluurt”?!
 
Hä stellte dä kleine Minsch, der nit ophüre dät ze lamentiere, op d´r Foßboddem. „Adam, darf ich vürstelle … dat es Eva, ding Jefährtin, die du bei mir en Auftrach jejowwe häs“.
 
„Eva, dat es Adam, dinge Mann. Du solls für Adam koche, Klamotte niehe un Kinder en die Welt setze“.
 
„WAT soll ich?!? Ben ich vielleich sing Sklavin? Beluur Dir dä Typ doch ens. Dä hät jo noch nit ens en Botz am Liev“.
 
„Ich jläuv, du bes och vun unge bes bovve nackelich. Und für die Botz solls du jo sorje. Ich ben für andere Sache zuständig“. Eva schnappte sich dä Kiddel vum Leeve Jott vum Hoke an d´r Wand und schmess sich dat Dinge öwwer.
 
„Ach? Für wat bes du dann zuständig“? „Ich dunn Obs un Jemös aanpflanze, Diere jage, uns ei Huus baue. Koht: Ich dunn für dich un für uns Pänz sorje“.
 
„Na ja, dat hüürt sich jo nit janz verkeht aan. Un ei lecker Kählche beste och. Dat muss ich jo zojewwe. Un außerdem: Hann ich dann en Wahl, Jott“?
 
„Enä, Eva. Selvs ich als Leeve Jott hann kein Möchlichkeit mieh, noch ene Minsch ze bastele. Mir es et Material usjejange. Dat die Minsche nit usstirwe, litt jetz janz allein an üch zwei“.
 
Eva luurte sich Adam janz jenößlich vun alle Sigge aan. „Do maach Dir kein Sorje, Jott. Dat krieje m´r schon hin“.
 
„Jot. Dann setze ich üch zwei jetz also ob d´r Ääd aff. Maht m´r kein Schand! Es jit nur die eine Ääd. Dot se m´r en Ihre halde. Maht nix kapott“.
 
Hä packte sich met d´r rächte Hand Adam und met d´r linke dat Eva, öm se op die Ääd ze setze. „Noch jet: Dä Kiddel bliev he. Der es mir. Musste dir selvs eine niehe. Wat ich äwwer sage wollt: Luurt ens he hin. Dat Fleckchen Ääd läje ich üch besonders an et Hätz. Direk an dem jroße Fluss. Rund un eröm schönste Landschafte. Koht: Wenn ihr schlau sitt, dann loht ihr üch do nidder. Und falls ihr et noch nit jemerkt hat, ihr doht jenau su schwaade, wie ich. Ich schecke üch also met mingem jöttliche Dialekt op die Ääd. Adtschüss“.